سی ئێن ئێن سەرکەوتنی جۆ بایدنی راگەیاند

  2020-11-07  | 
واشنتن
 تۆڕی هەواڵی ژیان
تۆڕی هەواڵی سی ئێن ئێن و بەشێک لە میدیاکانی ئەمریکا سەرکەوتنی جۆ بایدن بەربژێری دیموکراتەکانیان لە هەڵبژاردنی سەرۆکایەتی ئەمریکا راگەیاند.

سی ئێن ئێن و بەشێک لە میدیاکانی ئەمریکا بڵاویانکردەوە، جۆ بایدن بەربژێری دیموکراتەکان بە بردنەوەی دەنگەکانی ویلایەتی پێنسیلڤانیا، توانیویەتی ٢٧٣ کورسی دەستەبەر بکات و بوو بە ٤٦ەمین سەرۆکی ویلایەتە یەکگرتووەکانی ئەمریکا.

ئاماژەیان بەوەشکردووە کە ئەمشەو جۆ بایدن وتاری سەرکەوتن پێشکەش دەکات.

بردنەوەی ئەمجارەی دیموکراتەکان بەسەر کۆمارییەکان مێژووییە، بایدن زیاتر لە 4 ملیۆن دەنگی لە ترەمپ زیاترە، بایدن 50.6 لەسەدای دەنگی بەدەستهێناوە کە دەکاتە دەنگی 74 ملیۆن و 847 هەزارو 834 کەس، ترەمپیش 47.7٪ی دەنگەکانی بەدەستهێناوە، ئەویش دەکاتە 70 ملیۆن و 591 هەزارو 531 دەنگ.

ئەگەرچی تاوەکو ئێستا ویلایەتەکانی نیڤادا و جۆرجیا ماون یەکلایی ببنەوە، بەڵام لە هەردوو ویلایەتەکان بایدن لەپێشە، تەنیا لە ویلایەتی کارۆلینای باکور ترەمپ لەپێشە، بەڵام بە یەکلاییبوونەوەی هەردوو ویلایەتەکە بردنەوەکەی دیموکراتەکان مێژووییە.