کەمێک پێش ئێستا لە فڕۆکەخانەی هەولێرەوە شاندی دانوستانکاری هەرێم بۆ گفتوگۆکردن لەسەر بودجەی 2021 گەڕایەوە بەغدا.
شاندەکە قوباد تاڵەبانی جێگری سەرۆکی حکومەت سەرۆکایەتی دەکات و بڕیارە گفتوگۆی یەکلا کەرە و چارەنوسساز لەسەر پشکی هەرێم لە بودجەی عێراق ئەنجامبدات.
بەپێی زانیارییەکان زۆرینەی بڕگە و ماددەکانی بودجەی عێراق لەلایەن لیژنەی دارایی پەرلەمانەوە داڕێژراونەتەوە تەنها ئەو بڕگە و ماددانە ماون کەتایبەتن بە پشکی هەرێم، بۆ ئەوەش لیژنەی دارایی پەرلەمان چاوەڕوانی دوا رێکەوتنی نێوان شاندی هەرێم و لایەنە سیاسیەکانە.
میدیا عێراقیەکان بڵاویانکردەوە ئەگەری زۆرە پەرلەمان لەم هەفتەیەدا پەسەندکردنی پرۆژە یاسای بودجە بخاتە بەرنامەی کارەوە و دەنگی لەسەر بدرێت.
بەپێی ڕەشنوسی پرۆژە یاسای بودجە کە لەلایەن حکومەتەوە ئامادەکراوە و ڕەوانەی پەرلەمان کراوە پشکی هەرێم بە زیاتر لە 13 تریلۆن دینار دیاریکراوە و لەبەرامبەردا پێویستە هەرێم رۆژانە پارەی 250 هەزار بەرمیل نەوت و نیوەی داهاتە فیدراڵیەکان ڕادەستی بەغدا بکات.
شاندی هەرێم زیاتر لە 10 جار سەردانی بەغدایان کردو و لەگەڵ حکومەت و سەرجەم لایەنە سیاسیەکان و لیژنەی دارایی و پەرلەمانتاران کۆبونەوەیان کردوە و ئامادەیی خۆیان بۆ ڕادەستکردنی بڕی 250 هەزار بەرمیل نەوتی رۆژانە دەربڕیووە،بەڵام بەشێک لە لایەنە سیاسیە شیعەکان داوای ڕادەستکردنی کۆی دۆسیەی نەوتی هەرێمیان کردوە.
لەبەرامبەردا رۆژی 10 ی شوبات لە کۆنفرانسێکی رۆژنامەنوسیدا مەسرور بارزانی سەرۆکی حکومەتی هەرێم ڕادەستکردنی کۆی پرۆسەی نەوتی بەبەغدا رەتکردەوە و ڕایگەیاند ئەو بابەتە دەستوری نییە و ئامادە نین دەست لە هیچ مافێکی دەستوری خەڵکی هەرێم هەڵبگرن.
لەلایەکی دیکەوە حکومەتی هەرێم سەرقاڵی ئامادەکردنی پرۆژە یاسای بودجەی 2021 ی هەرێمە و چاوەڕوانی دواین رێکەوتنی و پەسەندکردنی بودجەی عێراقە بۆ خەمڵاندنی داهات و خەرجییەکانی هەرێم و جێگیرکردنی لەناو بودجەکەدا.