ئەنجومەنی دادوەری هەرێمی كوردستان، لەبارەی دادگاییكردنی دەستگیركراوەكانی بادینان روونكردنەوەیەكی بڵاوكردەوە و تیایدا رایگەیاند، به شێوهیهكی ئاشكرا و شهفاف بەڕێوەچووە.
ئەنجومەنەكە راشیگەیاندووە، هەندێ دامودەزگای فەرمی و یاسایی ولایەنی سیاسی لێدوانی جیاجیایان لەسەر پرۆسەی دادگاییكردن و بڕیارەكە داوە كە ئەمەش بێگومان دەچێتە چوارچێوەی دەستێوەردان لە كاروباری دەسەڵاتی دادوەری.
دوێنێ دادگاكە بڕیاری شەش ساڵ زیندانی بۆ پێنج رۆژنامەنووس و چالاكوانی شاری دهۆك دەركرد، دواتر لایەنە سیاسیەكان و پەرلەمانتارانی بەشداربووی دادگاییەكە و پاریچزەران ناڕەزاییان لە دژی بڕیارەكەی دادگا دەربڕی:
دەقی روونكردنەوەی ئەنجومەنی دادوەری هەرێمی كوردستان
دوێنێ رێكەوتی 16/2/2021 داوای ژمارە (47/ج 2 / 2021) كە تایبەت بوو بە بینینی كەیسی چەند تۆمەتبارێك، بە سەرۆكایەتی سەرۆكی یەدەگی دادگای تاوانی هەولێر/2 بەڕێوەچوو. بە پێی یاساش سەرۆكی یەدەگ لە كاتی نەبوونی سەرۆكی دادگا، شوێنی دەگرێتەوە چونكە سەرۆكی دادگا بەهۆی تێكچوونی باری تەندروستیەوە ئێستا لە دەرەوەی هەرێم چارەسەری پزیشكی وەردەگرێت و ئەو كەیسە هەر لە دادگای تاوانی هەولێر / 2 بەڕێوە چووە و رەوانەی دادگایەكی دیكە نەكراوە.
هەروەها پرۆسەی دادگاییكردنەكەش بە شێوەیەكی ئاشكرا و شەفاف و بە ئامادەبوونی ژمارەیەكی زۆر لە پەرلەمانتارانی بەڕیز و نوێنەری كۆنسولی وڵاتان و پارێزەرانی كەیسەكە و نوێنەری رێكخراوەكانی مافی مرۆڤ و رۆژنامەنووس و دەزگاكانی راگەیاندن بەڕێوەچووە و پرۆسەكەش لەسەر بنەماكانی دادگەری بووە.
بەڵام ئەوەی جێی سەیرە لە دوێنێوە هەندێ دامودەزگای فەرمی و یاسایی ولایەنی سیاسی لێدوانی جیاجیایان لەسەر پرۆسەی دادگاییكردن و بڕیارەكە داوە كە ئەمەش بێگومان دەچێتە چوارچێوەی دەستێوەردان لە كاروباری دەسەڵاتی دادوەری، چونكە دادگا نوێنەرایەتی دەسەڵاتی دادوەری دەكات و دەسەڵاتی دادوەریش بڕوای بە بنەمای جیاكردنەوەی دەسەڵاتەكان هەیە و نەدەبوو ئەو لایەنە فەرمیانە پێشێلی بنەمای جیاكردنەوەی دەسەڵاتەكان بكەن.
هەروەها رێكاری یاساییش هەیە بۆ تانە لێدان لەو بڕیارە و بێگومان پارێزەرانی كەیسەكە تانە پیشكەش بە دادگای پێداچوونەوە دەكەن، ئیتر پێویست بەو هەموو لێدوان و دەستێوەردانە لە كاروباری دەسەڵاتی دادوەری نەدەكرد.
هیوادارین ئەو جۆرە لێدوانانە نەدرێن تاوەكو بڕیاری كۆتایی لەلایەن دادگای تایبەتمەند كە دادگای پێداچوونەوەی هەرێمی كوردستانە دەردەچێت و دادگای پێداچونەوەش بڕیاری یەكلاكەرەوەی خۆی لەسەر ئەم كەیسە دەدات بە پێی یاسا.
ب. راگەیاندنی ئەنجومەنی دادوەری هەرێمی كوردستان
17/2/2021
بە وتەی سەرۆکی فراکسیۆنی گۆڕان لە پەرلەمانی کوردستان کە لە ماوەی رابردوو رایگەیاند زیاتر لە 70 چالاکوان و رۆژنامەنووس لە سنوری بادینان دەستگیرکراون.
رۆژی 14ی ئەم مانگەش دادگا بڕیاریدا دۆسیەی هەریەکە لە بەدەل بەرواری و ئومێد بەرۆشکی بگەڕێندرێتەوە بۆ لێکۆڵینەوە بە هۆی ئەوەی پەڕاوی لێکۆڵینەوەکانیان کەمی هەبووە.
لە ئێستاشدا ژمارەیەکی دیکەی چالاکوانانی بادینان لە زینداندا ماونەتەوە و وادەی دادگاییکردنیان دیارینەکراوە.