سەدان هێندەی سلێمان هەڵشۆی پارە هەموو میللەتیان خواردوەو دەیخۆن و دەیان كەناڵیان داناوە، سەد هێندەی سلێمان تاوانبارن و كەس باسیان ناكات.
دوو ڕۆژە هەموو باسێك بووەتە سلێمان هەڵشۆی، وەك دەڵێن: ٣٥ ملیۆن دۆلاری خەڵكی خواردوو.
ئەوەی سلێمان چەند مانگێك بوو، هی ژمارەیەك خەڵك بوو، كەمێك پرسیاریان كردبا دەیانزانی ئەمە فێڵەو هیچ مامەڵەیەك ئەو قازانجە ناكات! سلێمان دەستگیركرا، كۆمەڵێك خەڵك زیانیان بەركەوت.
تۆ دەتوانیت مامەڵەی لەو شێوە نەكەیت و پارەت نەخورێت! بەڵام چی لەو هەموو "سەركردە" دەكەیت بەزەوی و قاچاخی و نەوت و كۆمپانیاكاری و بەشتیوانی هێزی چەكدارو دەسەڵاتیان سەدان هێندەی سلێمانیان لە خەڵك بردوەو كەس باسی ناكات!
سلێمان پارەی ٢٠٠ كەشی خواردبێت! بەهۆی گەندەڵی و خراپ بەڕێوەبردن پارەی سەدان هەزار موچەخۆریان خواردوە..
قەبارەی ئەو پارەی هەموو مانگێك لە قاچاخی و كۆمپانیا كاری لە هەموو خەڵكی دەبەن، حەوت هێندەی ئەو پارەیە سلێمان لە خەڵكی خواردوە..
ئەو پێنج ملیار دۆلارەی شیرینی نەوت چارەنوسمان نەزانی ١٤٣ هێندەی ئەوەی سلێمان بوو!
ئەوەی بەهۆی گرێبەستی خراپ و گەندەڵی و بەفیڕۆدان لە دۆسیەی نەوت دەبرێت مانگانە، لەوەی سلێمان زیاترە..
كاتێك زەویەك بێ بەرامبەر دەدرێتە كە سێك لە هەولێرو و بایی نزیكەی ٨٠٠ ملیۆن دۆلاری مەتر مەتر لێدەفرۆشێت ( شاری خەونەكان)، ٣٦ هێندەی ئەوەی سلێمان هەڵشۆیە!
ئەو پارەیەی مانگانە بەخانەنشینی نایاسایی و پیشمەرگەی دێرینی ساختەو شەهیدی ساختەو كەم ئەندامی سەنگەری ساختە... دەدرێت زۆر زیاترە لەوەی سلێمان...
ئەو كۆمپانیا موبایلەی ٢٠٠ ملیار دیناری زیادەی لە خەڵك وەرگرت و بڕیار بوو ڕاستەخۆ بیداتە حكومەت و بۆی كرایە قیستی ١٦ ساڵ ! زۆر زیاترە لەوەی هەڵشۆی..
دەتوانین دەیان دزی دیكە دیاری بكەین زۆر زیاترە لەوەی سلێمان!!
گرفتەكە ئەمەیە... هیچ كەس نە بە نوكتە و نە بە جدی باسی ئەم دزی و دزانە ناكات! سلێمان چەند مانگێك بەردەوام بوو ! بەڵام ئەمانە سی ساڵە خەریكن و ئێستاش بەردەوامن! سلێمان دەستگیركرا ئەمانە چەكداریان هەیە خەڵك زیندان دەكەن و دەچنە سەر خەڵك و قاچاخی دەكەن!!
گرفتەكە گەورەكە ئەوەیە، ئەوانەی سەدان هێندەی سلێمانیان لە خەڵك بردوەو بەردەوامن هەزار كەس وەك "سەركردەو فریادڕەس" دەیان بینن!! و بە سلێمان دەڵێن ساختەچی!!