یەکێتیی لەم هەلومەرجەی وڵاتدا دەستی داوەتە هەڵمەتێکی رەوا و رەوانی سیاسیی بۆ ڕاستکردنەوەی رێرەوی حوکمڕانی و تەواوکردنی ئەرکی هاوسەنگردنەوەی هێز لە کوردستاندا . خەڵکی کوردستان دەزانن ئەم ئەرکە دیموکراتی ، چاکسازی و نیشتمانییە هەر بە هێزێکی دەربەست و سەنگینی وەکو یەکێتیی ددکرێت. لەبەر کۆمەڵێک فاکتەری مێژوویی و دیفاکتۆ بەتایبەتی دوای سارێژبوونی زامەکانی گۆڕین و یەک دەستی و یەکبڕیاری.
ئەم هەڵمەتە دەیەوێ بە سیاسەت و خەباتی مەدەنی هەڵبژاردنی کوردستان بکاتە هەلی زێرین بۆ گۆڕانکاری و رووی  لە ئامانجی سەرەکی خۆیەتی کە ژیان و گوزەران و یەک پارچەیی هەرێمەکەشمان دەرباز دەکات لە فەوتان و پاشەکشێ . ئەم هەڵمەتە بە پلەی یەکەم رووی لە دەسەڵاتی قۆرخکاری باڵێکی ناو پارتییە کە بەدنەدانی مەسرور بارزانی خەریکە سەرلەبەری ئەزموونی سیاسیی کوردستان، ئیدارە و حکومەتەکەش ئەخاتە بەردەم هەڕەشەی پەکخستن و هەڵوەشانەوە. دیاردەی بە کارهێنانی دامەزراوە رەسمییەکان و فیگرەکانی پارێزگا و ئەمنیەت و میدیا و خیتابی رەسمی بۆ هێرشکردنە سەر  حزبەکانی تر، هاوبەشەکانی حوکمڕانی و تەنانەت هەندێک جار بە ئامانجگرتنی هاوڵاتی ئاسایی تەنها  لەبەر ئەوەی لە (زۆنی نەفرەت ) دەژین. بەڵگەی بەرچاو و ئاشکران لەسەر ئەوەی ئەو باڵەی ناو پارتی و بازنەی تەسکی حکومەت( کە وەک ئەنجومەنی موسەغەر)وان  لەداخ و لە تاوی قینیان لە نەیارە سیاسییەکانیان  خەریکن هەموو دەزگاکانی حکومەت بێ ئەرزش دەکەن . وەک بڵێی ئامرازی هەڵبژاردن بۆ گۆڕانکاری لە حکومڕانی نییە، بەڵکو بۆ هەڵوەشاندنەوەی سەرلەبەری حکومەتە. بەتایبەتی وەکی هەست دەکەن خۆیان قۆرخکاری لەمەودوا و بڕیاردەری یەکەمی نابن.
شێوەی ئیشکردنی ئەو باڵە سەرلەبەری دەزگاکان بێ بەها دەکەن و وەک لق و ناوچەی پارتی لە جیاتی ئەوان کەمپینی شەڕی مەغلوبە دەکەن.
لەبەر ئەم هۆکارانە دیمەنی سەرەکی ئەم هەڵبژاردنە ململانێیە لە نێوان روانگەی ڕاستکردنەوەی رێرەو و روانگەی درێژەدان بە فەلاکەت و چەوتی و قۆرخکاری.
دیارە هەڵبژاردن و دیموکراسیی چەندین هێز و کارەکتەری بەشداری تیایە کە واجبی هەموانە حورمەتی ئەم ململانێ فرەییە بگرن و هەموو لایەک قسە و ڕا و بەرنامەی بەریەککەوتووی خۆی جاڕ بدات. یەکێتیی لە روانینی دیموکراسیی و هەروا روانینی ئیلتزام و  پابەندی بە بنەمای گەمەی هەڵبژاردنیشەوە ئەمە دەزانێ و دەبینێ و تەنانەت هەندێک پەلاماردانی لابەلای هەندێک هێزی دۆست  بۆ سەری دەخاتە چوارچێوەی (ئاگری دۆستانە) و بە رۆحی وەرزشی مامەڵەیان  لەگەڵ دەکات.     
بەڵام بە دیقەتدانی ورد و بە روانینی شێنەیی لە دەفتەری ئەشعار و دیوانی پێنج خشتەکی هەندێک و دەفتەری شیعار و دەفتەری قەرزی کەڵکەبووی  هەندێکی تر روون دەبێتەوە کە ئەوی ئەوانە دەیڵێن بەرنامەی نۆرماڵی هەڵبژاردن و گوتاری سیاسیی دەربەست نییە کە بەشێک لەو تەرەفگیرانە بەرپایان فەرمووە ، بەڵکو دیارە شەڕی کۆنەقین و شەڕی بە وەکالەتی لایەنی بەرامبەری یەکێتییە کە تیمەکەی  ئەولا هەڵیدەسوڕێنێ  و بگرە هەڵیدەپەڕێنێ.
ئەم شەری بە وەکالەتە دژی یەکێتیی ناوی خوازراوی جوانی بۆ هەڵبژێدراوە ، وەکو رەحمەتی هەڤاڵ دکتۆر کەمال فوئاد دەیگوت (ئەلقابگەل شیرین) یان هەس  بەڵام هەمان ناوەرۆکی قێزوەنی جارانی هەمان کۆنتڕا یەکێتییە کە پارە و پاوەری زۆری خراوەتە خزمەت.
شەڕی بە وەکالەت وەک ململانێی زەمانی سیاسەتی نیشتمانیی  دکتۆر موسەدەق ژووری ئۆپەراسێۆن و پەیج و  لایڤ و  دەستەسڕ و گۆرانی سەقەتی شەقاوەکانی  شەعبان جەعفەری( شعبان بێمخ)ی بۆ سازدراوە.
وەک دەبینن وا وردە وردە رۆژانە ئەو بڵقانە دەتەقنەوە و خەریکە پێش دەستپێکی هەڵمەتی رەسمی کەمپینی هەڵبژاردن دەستەکەیان کەشف دەبێت.