ئیوارەی ئەمڕۆ لە شاری سلێمانی سەرۆکی یەکێتیی نیشتمانیی کوردستان لە دەباشان پێشوازی لە سەرۆکی هاوپەیمانیی نەسر کرد.
لە راگەیەندراوی کۆبوونەوەکەدا ئاماژە بەوەدراوە، لە دیدارێکدا كە رەفعەت عەبدوڵا، بڕیاردەری دەستەی کارگێڕی و خالید شوانی، ئەندامی مەکتەبی سیاسی و نزار ئامێدی، وه‌زیری ژینگه‌ی عیراق ئامادەیبوون، لە دیدارێکدا جەخت لەپەرەپێدانی پەیوەندی لەمێژینەی نێوان هەردوولا و بەردەوامی هەماهەنگییەکان کرایەوە لەپێناو پاراستنی بەرژەوەندییە باڵاکان.
ئاماژە بەوەشدراوە، هەر لە دیدارەکەدا گرنگی گفتوگۆ و بەردەوامیی دیالۆگی نیشتمانی نێوان لایەنە سیاسییەکانی هەرێم و عیراق بۆ چارەسەرکردنی کێشەکان لەپێناو دەستبەرکردنی ژیانێکی سەقامگیر لە وڵاتدا دووپاتکرایەوە.
لە کۆتایی راگەیەندراوەکەدا هاتووە، بافڵ جەلال تاڵەبانی جەختی لە چارەسەرکردنی کێشەکانی نێوان حکومەتی هەرێم و حکومەتی فیدراڵ لەسەر بنەمای دەستوور کردەوە و رایگەیاند، ناکۆکییەکان خزمەت بە هیچ لایەک ناکەن و پێویستە هەموومان پێکەوە کار بۆ بونیادنانی داهاتوویەکی گەشتر بکەین.