د. فەرهاد محەمەد مستەفا بەڕێوەبەری تەندروستی چەمچەماڵ رایگەیاند، ئێوارەی ئەمڕۆ یەکشەممە ١٩ی٧ی٢٠٢٠، ڕەزا محەمەد ئەسعەد کارمەندی بەئەمەک و دڵسۆز لە یەکەی پشکنینی خۆراکی بانی مەقان سەربە بەڕێوەبەرایەتی تەندروستی چەمچەماڵ بە نەخۆشی کۆرۆنا گیانی لەدەستداوە.

ئاماژەی بەوەشکرد، ناوبراو ساڵانێکی زۆرە لەیەکی خۆراکی بانی مەقان زۆر ماندوونەناسانە ئەرکی خۆی رادەپەڕێنێ و لەدەستدانی کەلێنێکی گەورەیە و هەرگیز پڕنابێتەوە.

بەڕێوەبەری تەندروستی چەمچەماڵ هاوخەمی خۆی بۆ بنەماڵەی کۆچکردوو دەربڕی و رایگەیاند، سەرەخۆشی لەخۆمان و کەسوکاری دەکەین و داواکارین خوا سەبوری خانەوادەکەیان بدات .

پێشتریش د. فەرهاد محەمەد مستەفا بەڕێوەبەری تەندروستی چەمچەماڵ رایگەیاندبوو کە هەر ئەمڕۆ، تووشبوویەکی دیکەی کۆرۆنا کە پیاوێكی تەمەن 64 ساڵ و دانیشتووی قەزای دووز بووە،  گیانی لەدەستداوە.

بەپێی دواین ئاماری وەزارەتی تەندروستی حکومەتی هەرێمی کوردستان، لە سەرەتای بڵاوبوونەوەی ڤایرۆسی کۆرۆنای نوێ تاوەکو ئەمڕۆ، ١٠ هەزار و ٨٥١ کەس لە هەرێم تووشی ڤایرۆسەکە بوون، لەو ژمارەیەش ٤١٢ کەس گیانیان لەدەستداوە و پێنج هەزار و ٩٣٨ نەخۆشیش چاکبوونەتەوە و پەتاکەیان تێپەڕاندووە.