داگیرکرنا گەلەکێ یانژى کومەڵەکا مرۆڤان بۆ خەلکێ وەڵاتەکێ دیتر ستەمەکا مەزنە، بەهرەکا شاڕەزایێن سیاسى و جڤاکى داگیرکرنێ دبینن وەکو ئاستەکێ بەرزێ تیرۆرێ، و داگیرکەران ب دژوارترین جۆرێ تیرورستان دهەژمێرن!
براستى ئەو هەلسەنگاندنە ژلایێ پسپۆرێن سیاسى و سوسیولوجیڤە گەلەک دجهێ خوەدایە چونکى تیرۆرەکا مەزنتر سەختە کومەکا مرۆڤان کومەکا دیتر بکت بەندە و کوڵەیێن خوە، لێ ئەگەر ئەم ب هەمان پیڤەر بەرێخوە بدین هەڕەشە و مەترسیا گەندەڵیێ ئەوا وەکى پەنجەشێرەکا ژەهراوى د لاشێ گەل و وەڵاتێ کوردستانێدا بەڵاڤبووى دێ بساناهى بۆ مە خوەیابت ئەڤ گەندەڵیا بێ وێنەیا کوردى باندۆر و کارتێکرنا ترسناکتر ژ داگیرکرنێ هەیە، بەلکێ هێشتا تەڕازى د سەرکێ گەندەڵییا کوردیدا داگێڕایە.
دابهێن بشێوەیەکێ سادە و ئاسان بەرابەرکرنەکێ ب کین دناڤبەرا هەردوو جۆرێن ستەمێدا، دێ چەوان وەکهەڤی دناڤبەرا داگیرکرن و گەندەڵیێ یانژى دناڤبەرا داگیرکەر و گەندەڵکاراندا بۆ مە هەمیان باش دیار و ئاشکەرابت، و ئەگەر هندەک سیمایێت جوادایێ ئەم ببینن هەلبەت دێ د پلە و ئاستێ دژواریا کارتێکرنێدا بت نەکو د بناغە و ناڤەڕۆکا هەردوواندا.
ژبۆ ڤێ چەندێ وەکو نموونە دێ ب لایەنێ ئابۆرى دەست پێ کین: داگیرکەر چ کوڵونیالیست بن یانژى ئمپڕیالیست وەکى میکرۆب و ڤایرۆسان ل سەر خوینا مللەتان دژین، و لسەر حەسێبا وان بەردوامیا ددن ژیارا خوەیا قارۆنى، ئەها گەندەڵکار ژى هەمان خوینمێژتنا خەلکێ وەڵاتێ خوە دکن، وەکى ئەڤرۆ ئەم دبینن دەریایێت پترۆلا ڤى وەڵاتێ هەمیێ یێ ڤەدخۆن و ژبەردەستێن وان برمیلەکا گازا سپى قورتال نابت هاوڵاتیێ هەژار و زاڕۆکێن وى ژسر و سەقامێ بهێنە پاراستن، نەک پترۆل تنێ ژى بەلکى هەموو داهاتێن کوردستانێ ئەوێ ژکەرەم و چاکیێن خۆدێ ژ ئاخێ دزێن و ژ ئەسمانا دبارن هند ژ بەردستێن زاڵمێن گەندەڵکار ڕزگار نابت تێرا مۆچە و ژیارا فەرمانبەر و کاسبکاران بکت، و سەرەڕاى وێ هەمیێ ژى هێشتا نێزیکى (30) ملیار دۆلاران قەرا پشتا ڤى گەلێ بێ ئیفلەح شکاندینە.
و ژلایەکێ دیترێ یێ مەعنەویڤە داگیرکرن کەرامەتا مرۆڤێ دشکێنت، خودایێ مەزن دقورئانا پیرۆزدا ل سەر زمانێ شاها سەبەئی بەلقیس خاتۆنێ ڤەگۆهاستیە : ((إن الملوك إذا دخلوا قرية أفسدوها وجعل أعزة أهلها أذلة )) ، ب هەمان شێوە هاوڵاتى ل بن ڕەحما گەندەڵیێ و گەندەڵکارانڤە دەمێ ئاستێ تەعداکرنێ ل سەر هند زاڵ دبت تا ڕەنجا خوەها ئەنیا وى دهێتە خوارن و مەهانەیا وى ژوى دهێتە بڕین هێنکێ دبتە بەندەیەک (عەبدەکێ) شکەستى و ڕەزیل، و یێ بەڕەڤانیێ هەتا ب پەیڤەکا نەرم و ئاشتیانە ژێ بکت - مینا چالاکڤانەکێ دەڤەرا بهدینانان بەرێز مامۆستا بەدەل بەروارى - دێ زیندانێن تاریڤە رۆژ و مەهێن خوە بوورینت، چونکى عەبد دڤێت تەنها دەڤێ خوە بۆ پاریەکێ نانێ سوتى و خاڤ ڤەکتن نەبۆ ئاوازێن ئازادى و سەرفەرازیێ، ئەرێ ما نە حەقە بێژین مەرحەبا کەرامەتا وەڵاتیان!
و ئەگەر ژ کوژێ دەرۆنى ژى ئەناڵیست بکین، خرابکاریا داگیرکرنێ هندەک ژباشى و جوانیێ هەمبێز دکت، ئەو زۆڵمە گیانێ نیشتمانپەروەریێ و عیشقا ڕزگاریێ خۆرت دکت، و گرێدانا ب ئاخا وەڵاتیڤە بهێز دکت، و هندى داگیرکرن توندتر ببت ئیڕادەیا بەرخوەدانێ موکومتر لێ دهێت، هەتا ئەو رۆژە دهەلیتن کەرب و کینا پیرۆزا شۆڕەشگێریێ وەکى ڤوڵکانەکێ بناڤچاڤێن داگیرکەرانڤە ب پەقیت و نەورۆزەکا دن دیسان ساخ ببیت، لێ مخابن ب گەندەڵیێرا وێنە تاریە و هیچ هەبوونەک ژبۆ جوانیێ نینە، گیانێ نیشتمانى دبتە زیڕۆ، و ڕۆژ ب ڕۆژ وەڵاتى پتر تێدگەهن ژ وەڵاتى تەنها زڕبەهرى و هەژارى یا وانایە، و ئێدێ وەکى هوزانڤەک ب یەڤێن خوەیێن خەمۆکێ دیارکری: "مەرگەساتا هەرە مەزن تۆ د وەڵاتێ خوەدا ئێخسیربى"، یا ڕاست ژى کوردستانایان ل ژێر داگیرکرنا گڕۆپێن گەندەڵیا رێکخستى قویناخا ئێخسیرى دەربازکرینە و نها یێن بووینە کوڵە ڕاست و درۆست.
ئەڤا بوورى بتنێ پانۆڕامەکا بلەزا چەند دیمەنکێن تڕاژیدى ژ چەنگا داگێرکرنا گەندەڵیێ بوو ل دژى خەلکێ ڤى خاکى، لێ هەر چەوان بت ژبۆ مرۆڤێن بچەک هەست و هۆش هەین باش باش دیارە هێشتا گەلەک مایە تا چاڤێن مە تیڕێژکین ئازادایێ ل کێمترین ئاست ژى ببینن.