کوردی  |  English            

هەڤپەیمانا (هیوا).. بزمارەک ژ بۆ تابۆتا ڕۆبوتیێ

جاسم محمد شرنەخى

نوسەر و بەرپرسی مەڵبەندی یەکگرتوو لە زاخۆ
  21/01/2021  |    760 جار خوێندراوەتەوە
هیچ تشتەک وەکى ئێکرێزیێ گرنگ و ژهەژى نینە لێ ب مەرجەکێ ئەگەر ل سەر بنیاتەکێ دروست ئاڤاکرى بت، بنگەهێ وێ هەڤکاریا ل سەر چاکیێ بت مینا خوداى گۆتى: ((وَتَعَاوَنُوا عَلَى الْبِرِّ وَالتَّقْوَىٰ))، ئەها ل سەر ڤى بنەمایى دڤیا پاراستن و بەرەڤانیکرن ژ بەرژەوەندیێت خەلکێ کوردستانێ بنسترا هەڤگرتنا نوینەرێن کورد با ل بەغدا.

   گەر ب وى ئاوایى سیاسەت هاتبایە کرن هەر کار و کریارەکا بەرۆڤاژى وێ دا تاوانەکا ل بەژنا چیا بلند بت و دا خیانەتەکا نیشتمانیا مەزن و بێ لێ بوورین بت، لێ گومان نینە تاوانا ژوێ مەزنتر ئەوە هەمى گازى و هەوڵ ژبۆ ئێکڕیزیەکا دیتر بت، ل سەر بناغەیەکێ جودایێ دویربت ژ بەرژەوەندیا تاک و چڤاکێ کوردى، هەڤگرتنەک بت تەنها ژبۆ بەرژەوەندیا ئەوێ دەستەهەڵاتێ بت یا کوتکا ڤالا کریە د لەپێت هاوڵاتیێ کوردستانێدا، ئەوا ل ڤێرێ برس و وهەژارى و گەندەڵى و شکەستنا سیاسى بەر بەڵاڤکرى، و ل بەغدا ژى – ما شەللا – مە دیت چ ڕەنگێ سیاسەتێ ژ دەستپێکێ و تا نها پەیڕەوکریە، هەر ئەوە ئەوا بوویە ئەگەرێ وێ چەندێ حکومەتا هەرێمێ هند لاوازبت تا وێ یەکێ نکارت رێڤەبەریەکا بچەکی قەنج بکت دهەڤپەیڤین و (موفەوزاتاندا) ل گەل حکومەتا فیدرال، و نەشیایە پێگیربت ب وان رێکەفتنێن ئیمزا ژلایێ ب خوە ل سەر هاتیە کرن پێخەمەت دابینکرنا تشتەکێ کێم ژنانێ خەلکێ و وێ ژیارا ب مۆچەیانڤە هاتیە گرێدان!!

  تشتێ زۆر دلئێش ئەوە سەرەڕاى ئەڤا بووری لێ تا ئەڤرۆ پڕۆپاکندەیەکا وەخت ب سەرڤەچوویا بەردەوام هەیە، ل سەر داخوازەکێ بتنێ یا ڕژدە: "دڤێت تەڤ نوینەرێت کورد ل بەغدا ل هەمى دەما هەڤگرتیبن" ڤێجا هەڤگرتن ل سەر چى بت، و ڕەوا بت یانژى نەیا نەڕەوا بت خەم نینە، ببت ئالیکارى ژبو ستەم و خرابکاریێ نەمازە خرابکاریا سیاسى ژى هیچ کێشە ل دەڤ خودانێت ڤێ گازیێ نینە،  بلا بخۆ ئەو ژى بت یا خۆداى قەدەغەکرى: ((وَلَا تَعَاوَنُوا عَلَى الْإِثْمِ وَالْعُدْوَانِ)) زۆر ئاساییە!، باش هەوار چەوان چێدبت گەلەک کۆمەکى ل سەر بێ دەنگیێ ژ داخوازیا مافێت هاوڵاتیان و پاراستنا بەرژەوەندیێن وان پەیڕەو ببت!!، باشە چ عەقل وژدان قەبیل دکن ب هێجەتا هەڤهەلویستی و هەڤگرتنێ هەمى پەرلەمانتار ببنە ڕۆبۆت ژبۆ بجهئینانا فەرمانێت هندەک سەرێن مەزن!

   مخابن تا نها ڕەوشەنبیریا پرلەمانتارێ رۆبۆت یا زاڵە ل سەر عەقلێ سیاسیێ کوردى، من ب گوهێت سەرێ خۆ - ژ هندەک پەرلەمانترێن بەرنیاسێت کورد ل بەغدا- بهیست ژ هەمى عەقلێن خۆ دگۆتن: "ئەم چووینە بەغدا دا پەیڕەوێ حزبا خۆ ئەوا ئەم گەهاندین کورسیێن ئەنجۆمەنێ نوینەرێن عیراقێ بجهبینن"، ئانكو تێگەهەهشتنا وان ژ پەرلەمانتاریێ ئەوە کۆڵەیێن بەلێ و لەبێ بن، و ژفەرمانێت حزبا خۆ جارەکێ بتنێ ژى دەر نە کەڤن، و فەرمانا مللەتى پێخەمەت خزمەتا گشتى بلا بچت قیرێدا!

  ژ ڕەوشا رۆبۆتیی و ڕۆپاتان یا ناخبڕ و ئومێد کوژ بزاڤەکا وژدانى و عەقلانى سەرێ خۆ هەلدا وەکو ئاوڕەک ل مافێ خودان مافان ژ هاوڵاتیێن کوردستانێ، و هەمى گازیێت ئێکرێزیا بێ دەنگیێ هەمبەر مەترسیێت ڕاستەقینە پاشگوهکرن، چ یێت دژى بەرژەوەندیێت بەروەخت بن – ئەوێت ب نان و ژیارا کودرستانیانڤە گرێداى – یانژى یێت دژى بەرژەوەندیێت چارەنڤێساز بن.

 ئەڤ لڤینا نوى ئەوا ب ناڤێ هەڤپەیمانیا (هیوا) خۆ دایە نیاسین ئومێد و هیوایەک ژبۆ خەمخۆر و دلسۆزان چێکر ئێدێ خەباتەک هەیە بەرەڤ پەرلەمانتاریەکا پیشەییا دروست یا دویر ژ ریمۆتکونترۆلا گرۆپێن خۆ پەرێس.

  هەر چەوان بت چەندین خاڵێن هێزێ یێن گەش و ئەرینى د پەیدابوونا ئەڤێ هەڤپەیمانیا هەنە و ژوان:

- قەبارە و سەنگا ڤێ (هیوا)ـیێ نەیا کێمە، (15) پەرلەمانتار ل خوە کوومکریە.

- ژبلى قەبارەى ژى هێزەکا جۆرى هەیە ژبەرکو چالاکترین پەرلمانتار چووینە دناڤا ڤى خیڤەتیدا.

- پڕەڕەنگیا هزرکى و سیاسی ئەوا ڕەگڤەدانا حۆ ژ چەندین بزاڤێت سیاسیێت کوردستانى وەرگرتی، و هندەک ژوان بزاڤان بەشدارن دحکومەتا کورستانێدا ئەوا هەمى دەما قاوناەکا دڕهاى لێ ددت: نابت تۆ دحکومەتێدا بى وپیەکێ تە ژدەرڤە بیت، و دەنگ و ڕەنگێ تە ل جهەکێ دیتر خوەیا ببت، واتە دەمێ تۆ حکومەتێدا بى فەرە وژدان و ئەرک و پێدڤیێن پیشەیی هەمیا بنپێ بکى، ئانکو کورت و کرمانج ببیە رۆبۆتەکێ ڕاست و درۆست.

  ئەز بخۆ ژ وى خەلکێ ب هیڤیە ئەڤێ (هیوا)یێ بزمارەک بهێز ژبۆ تابۆتا رۆبۆتیا ڕەش بەرهەڤکریە، و هەژیە شانازیێ پێ ببن.
زیاتر