سۆرانی  |  بادینی  |  English      

هەوڵا دەڤ دورینا نڤێسەران!!

جاسم محمد شرنەخى

نوسەر و بەرپرسی مەڵبەندی یەکگرتوو لە زاخۆ
  29/09/2020  |    493 جار خوێندراوەتەوە

ئەڤە دەمەکبوو دناڤا دەریایا تاریستانا بێ ئومێدیێدا، چرایەک هێدێ هێدێ ڕوناهیا وی گەش دبوو، ئەوژی بزاڤا نڤێسینێن ڕەخنەیی بوون ژلایێ چەند نڤێسەرێن وژدان زیندی و هزر ڕەوشەنڤە، لێ وەسا دیارە ئەڤێ چەندێ بيچەک تەنشتێن هندەکا خوراندن و نە ڕەحەتیەک ژ وانڕا پەیداکرن !

ئەڤجا چ بکن چ نەکن، ڕابوون پەنا برنە کارەکێ كەڤنێ دەم ب سەرڤەچووی، ب دانانا سانسۆرا هەمبەر بزاڤا ڕۆناکبیری ل هەڕێما کوردستانێ و ڕێک تەنگاڤکرنێ ل ڕەوشەنبیران، ئەو ڕێکا چ جاران ڤێ حکومەتێ هاریکاری تێدا نەکری و پشتەڤانیا نڤێسەری هەر نە هاتیە هزرا وێ ژی، ڤێجا سەرەڕای ڤێ چەندێ ژی نەمەردی نەکرن، ڕابوون ب دەرئێخستنا بڕیارا ئاڵۆزکرنا دانا ژمارەیا سپاردنێ کو ل 24-9-2020 ژلایێ وەزیرێ ڕەوشەنبیری و لاوانڤە ئیمزا ل سەر فەرمانەکا ویزاری هاتەکرن، کو هەر پەرتووکەکا بهێتە نڤێسین، دڤێت بەریا چاپکرنێ بهێتە هنارتن ژبۆ وەزارەتا ڕەوشنبیری و دویڤداچوونا هویر هویر بۆ نڤێسینێ هەمیێ بهێتە کرن، ئەڤجا کا دێ ڕازەمەندی ل سەر هێتە کرن، یانژی دێ هێتە هاڤێتن د نێزیکترین سەڵگا گلێشیدا !

لێ پشتی هەوەکا مەزنا نە ڕازیبوونێ د ناڤا تۆڕێن کومەڵایەتیدا گەرمبووی، ل ژێر فشارێ وەزارەتێ ناڤبری هەوڵا بچەک سڤکرنا وێ زێرەڤانیکرنێ کرن، و بڕیاردان سانسۆریەکا تایبەت ل هەر پاڕێزگەهەکێ هەبیت، کو ل هەر ئێکێ ژوان لیژنەیکا پێداجوونێ بهێتە بێکئینان، و ئەو بڕیارا چاپکرنێ یانژی ڕەتکرنا چاپکرنێ بدەن .

بڕاستی سەربور و بوریێ نوخبەیا دەستهةڵات، ئەڤا نێزیکێ 30 ساڵە حوکمڕانیێ دکت و ل کوردستانێ دۆپاتیێ ل ڤێ ڕاستیا تەحل دکت، کو ڕێک تەنها خۆشکری و قیڕکریە ژ بۆ پێنۆسێن ڕەشێن مەللاقیێ دکن، نەکو ژبۆ یێن ڕەنگسپی ئەوێن چرایێ ڕەخنێ دهەلگرن، و ئەها ئەڤ عەقلییەتا پاشڤەڕۆ بەریا ڤێ بڕیارێ ژی ب ماوەیکێ نێزیک ڤیا پێنگاڤەکا هەڤشێوەیا خراب پاڤێژت دژی هەرکەسێ کارێ ڕەخنێ بکت، ب خوە دوی جهێدا یێ بۆ خەلکی ڤی ئەردی هەمیێ ڤەکری ئانکۆ د سۆشیال میدیایێدا، لەوا هیچ گۆمان ل دەڤ خودانێن هزرا ڕەخنەیی نینە، کو ئارمانج ژڤێ بریارا وەزارەتا ڕەوشەنبیری هەڤپێچ دگەل هەوڵا بەری وی ژی تەنها سانسۆریە ل چاپکرن و بەڵاڤکرنا هەمی هزرێن نە ل دویڤ حەز و ڤیان و بەرژەوەندیێن ڤێ بژیارەیا مال ل کوردا دایە ڕەخەکی و خۆلیا گەرما پاشکەفتن و شکەستنا سیاسی و ئابۆری ب سەرێ کوردا وەرکری و فایڕوسێ كۆژەکێ کومەڵێ کۆ طەندەڵیە بەڵاڤکری .

ئەز بخۆ ل وێ باوەرێمە ئەگەر ئەڤ بریاریا ئەنتی ڕەوشنبیری ـ خودێ نەکت ـ سەر بگرت، دێ وی دەمێ وەکی ڕەوشا دکتاتۆریا پارتا بەعس لێ هێتن، دەربارەی بیاڤێ ڕصپێدای بۆ دەربرین و نڤێسینێ، ئانکو دێ بێژنە هەمی خودان شیان و بەهرەیێن ڕوناکبیری و رەوشەنبیری و ناخسمە نڤێسەران:

هوین ئازادن یا وە بڤێت بنڤێسن بەس مەرجەک بتنێ یێ هەی ئەوە دەربرین بت ژ ڤیانێ بۆ دەستهەڵاتێ، واتە هەر وەکی دبێژنە مە:

هوین ئازادن هەلبەستا ب ڤەهینن ب بەژن و باڵا میرێن خوە، یانژی بەخشانێ ب نڤێسن ب ئاقلمەندی و حیکمەت و فەلسفا سەیید رەئیسی، هوین ئازادن هوین چەوا زڕنابێژی و دەهۆلقوتیێ بۆ مە لێ بدن، لێ هەرتشتەکێ ژڤی چارچۆڤەی دەربازببت، ئەو دژی بەرژەندیێت بلندە و هەژی وەشاندن و بەڵاڤکرنێ نینە !

لەوا دڤێت هەمی خودان عەقل و وژدان و ل بەراهیێ ڕەوشەنبیر، ببنە دیوارەکێ پیلایی هەمبەر ڤێ بریارا خراب یا دژی ڕەوشنبیریێ ئەوا ژ دەڤ وەزارەتا ڕەوشەنبیری دەرچووی !! و یا ژمنڤە ئەگەر ڕەوشنبیران گیانێ بەرهنگاریێ خۆرت کرن، دێ کارن سەرکەفتنێ بهینن ل سەر ڤێ هەوڵا تاریکیا بەڕۆڤاژی پێ ل و تێژاڤا جیهانی پشتی کۆ گلوباڵیزمێ ئەڤە دەهان ساڵە چادرا خوە یا ب سەر ڤی ئەردێ و خەلکێ فی ئەردی هەمیێ دادادی، و ل ڤان چەند ساڵەکێن کێمێن بوورین، پەپڵویزمێ ژی دەرگەهێن دەربڕینا نڤێسینێ و بەڵاڤکرنێ ب هەمی جۆرێن وێڤە هەمبەر هەمی مڕۆڤایەتیێ کرینە تاق، ئەڤجا ژنوی چ هێز هەیە بشێت سنۆران دانت ل هەمبەر پێلێن بای ! گەلۆ خودانێن بەرتەسکرنا ئازادیا دەربرینێ، ئەوێن ڤیاین ب زەحمەتکرنا دانا ژمارەیا سپاردنێ دێ چ ل ڤاڵاهیا ئەسمانی کن هەمبەر نڤێسنا گەنجێن ڕەوشنبیر؟ !

زیاتر