دوو ديوارێن بهێز بەرامبەر بەدڕەوشتى و تاوانا گەندەڵیێ ل هەر وار و وەڵاتەکێ دڤێت هەبن هەتا ئەو جهە ژ قڕێژا پیسیا ڤێ خرابکاریێ پاراستى و پاکژ بمینت، دیوارێ ئێکێ وژدانا ئاڤەدان و زیندیە ب بهایێت پیرۆز، ویێ دویێ سیستەمەکێ ئیداری و یاساییێ ژێهاتیە پێى زێرەڤانى ل سامانێ مللەتى دهێتە کرن هەمبەر هەمى دز و خیانەتکاران.
دیوارەک بتنێ قەت نابتە پێشبڕەکێ موکوم نەهێلت تویفانا گەندەڵیێ ب سەر جڤاکیدا بهێت، دڤێت هەردوو پێکڤە هەبن، هەڵبەت بخۆ ئەگەر سەرکێش ورێڤەبەرێت جڤاکى پێغەمەبەرێت خۆدی ژى بن دیسان چارە ئەوە: هەر دوو دیوار هەبن، لێ هەوار تو چ دبێژى بۆ جڤاکەکێ وەکى یێ مە هەردوو هەلوەشای بن!!
ل ڤێرێ دەرفەت زۆر نینە بەحسێ هەردووان بکین، لەوا بلا دیوارێ ئیکێ بتنێ جهێ ئاخفتنا مەبت، چونکى ئەو پێشتگرەکێ بهێزە بۆ یێ دیتر ژى، مەرەما من کۆمەکا بهایێت بلندن ئەوێن تەکەستێ ل سەر پاکى و دەستپاکیێ دکن، ئەو بهایێن وژدانا مرۆڤى ئاڤ ددن ب باوەرى و ئیمانێ، لەوا بەرامبەر هەمى جۆرێن خرابى و ستەمێ دل هەستیار پێ دمینت، نەمازە ل دژى ستەما گەندەڵیێ ماکا هەمى گوننەهـ وتاوانان هەتا ژناڤبرنا مرۆڤان ژى هەر وەکى خودایێ مەزن ل سەر زمانێ فریشتەیان خوەیاکرى ل وى دەمێ ئەو ئاگەهدارکرین ب ئیرادەیا ڕادەستکرنا ئەردێ بۆ جهنشینەکێ نوى ئەوێ دبێژنێ مرۆڤ: ((وَإِذْ قَالَ رَبُّكَ لِلْمَلَائِكَةِ إِنِّي جَاعِلٌ فِي الْأَرْضِ خَلِيفَةً ۖ قَالُوا أَتَجْعَلُ فِيهَا مَن يُفْسِدُ فِيهَا وَيَسْفِكُ الدِّمَاءَ وَنَحْنُ نُسَبِّحُ بِحَمْدِكَ وَنُقَدِّسُ لَكَ ۖ قَالَ إِنِّي أَعْلَمُ مَا لَا تَعْلَمُونَ)) البقرە - 30
بڕاستى ژى وێ گاڤا وژدان دمرت و ترسا ژ بەرپرسیێ هەمبەر خودایێ مەزن نەمینت حەزا خرابکاریێ ل گەل مال و سامان و ئەمانەتا پۆستێن گشتى ل دەڤ گەندەڵکاران دبتن تشتەکێ زۆرێ ئاسایى، و ب ئەنجامدانا بەردەواما تاوان وبێ ڕەوشتیا گەندەڵیێ قاتەکێ ستویرێ قرێژا ڕەش و پیس دلان داگیر دگت: ، و ئێدێ وەکى کەڤران لێ دهێن و جهێ هەستێن نازک و مێهرەبانى و مرۆڤایەتیێ قەت نامینت وەکى خوداى وەسفکرى: ((ثُمَّ قَسَتْ قُلُوبُكُم مِّن بَعْدِ ذَٰلِكَ فَهِيَ كَالْحِجَارَةِ أَوْ أَشَدُّ قَسْوَةً)) البقرە 74، و هەتا باوەریا ب خۆدێ و هزرا سزادانا ل سەر تاوانێ ل رۆژا دویماهیێ ژى نامینت، چونکى ئەگەر کەسێ گەندەڵکار باوەریەکا کێم ژى هەبا کو یێ مال و سامانێ گشتى ب دزت، وى دەمى بخۆ رەحما خودێ یا بەرفەرەهـ ژى ژوى ناگرت، و خودا ل وى نا بوورت و حەتمەن دێ ڕویێت وى ڕەش کتن، و مالێ ئیتیم و هەژار و خەلکێ دێ ل بتە ئاگرێ دۆزەخێ مینا ڤێ گەڤا خودێ یا ب ترس ئەوا دبێژت: ((إِنَّ الَّذِينَ يَأْكُلُونَ أَمْوَالَ الْيَتَامَىٰ ظُلْمًا إِنَّمَا يَأْكُلُونَ فِي بُطُونِهِمْ نَارًا ۖ وَسَيَصْلَوْنَ سَعِيرًا )) النساء 10، ئەها ئەگەر ئەڤ باوەریە هەبا دل و دەستێن وى نە دگرت ڤێ خیانەت و بێ ڕەوشتیا هەرە مەزن بکتن.
ئەگەر بەرپرسێ مە باوەری هەبا پشتى ڤێ جیهانا فیزیکى ئێکا دیترا میتافیزیکى هەیە ئەوى نە دویریا تەعدایێ ل سەر مافێن وەڵاتى و خەلکێ ئەنجام بدت، و دا هوشداریا خودای ب گوهێت وى کەڤت دمێ ژ بانێ بلند خەلکێ هوشیار دکت: ((وَلَا تَأْكُلُوا أَمْوَالَكُم بَيْنَكُم بِالْبَاطِلِ وَتُدْلُوا بِهَا إِلَى الْحُكَّامِ لِتَأْكُلُوا فَرِيقًا مِّنْ أَمْوَالِ النَّاسِ بِالْإِثْمِ وَأَنتُمْ تَعْلَمُونَ..واتە: مالێ هەڤدوو نەخۆن ب نەحەقى و ب هەڤڕکیا نە دروست ل دەڤ حوکمداران ب رێکا لەیزتن و فێلبازیەکێ تشتەکێ بۆ خوە ب دەست بێخن، و د بنیاتدا نە ژ مافێن هەوە بتن)) البقرة 188.
و دكەڤن و نویدا پەروەردەیا رۆحى و ئیمانى کا
رتیکرنەک مەزن هەیە ل سەر هەستیارکرنا کەسى و کومەڵێ هەمبەر مالێ گشتى، یا بەربەڵاڤە دمێژوویێدا کو حاکمەکێ ژ خودێ ترس مینا عومەرێ کورێ عەبدولعەزیزى چرایێ ب زەیتا حکومەتێ ئاگرێ وى ڕۆهنى ددا ڤەمراند، و مێهڤانەکێ خوە هێلاتە دتاریێدا هەتا چوویە چرایێ خوەیێ تایبەت هەلکرى، چونکى تەوەرەکێ ئاخفتنا مێهڤانێ ل دۆر بابەتەکێ تایبەت ڤەبوو نەک بابەتەکێ گشتیێ بوو، و وى دەمێ ئەڤ چیایێ پاکیێ بەرز خوەیا دکر پاکى و دلسۆزى هەمى کنارێن دەولەتێ گەش کربوون.
بهایێت رۆحى و ڕەوشتى یێت هەمى ئاینان ب خوە ئەگەر ئاینەکێ چێکرى ژى بت کارتێکرنا خوە هەیە، ل ڤی بیاڤى دا بەرێ خوە بدن دەستپاکى و ڕەوشتبەرزیا خەلکێ یابانێ چەوان نموونەیێن بەرز و جوان پێشکێش دکن و گەندەڵیی جهێ خوە د جڤاکێ یابانیدا نە دیتیە، بۆ نموونە دا بەس بەرێ خوە بدین ڕەفتارێن ڤى گەلێ پیشەنگ ل دەمێ کارەساتەکا وەکى یا ل 11 - ئادارا - 2011 ڕویداى دەمێ پیڤەلەرزەکا توند ب پلەیا 8.9 گۆرەى پیڤەرێ ريختەر ل رۆژهەلاتێ ڤى وەڵاتى دا ، چەوان یابانیان کەل و پەلێن فەرمانگەهـ و مارکێتان ل خوەدى و حکومەتێ ڤە دگەڕاندن، و هەتا پارەیێن سەرئاڤا تسۆنامیێ دکەفتن کووم دکرن و ل بانکێن دەولەتێ ڤە زڤڕاندن!
هەر چەندە هەتا ساڵەکا دیتر نموونەیێت جوانێن پاکى و پاقژیێ بۆ مەزنێت کوردستانێ یێت حەرامخۆر بهێنە گۆتن دێ مینا وێ ئاڤێ بتن یا تۆ ب کولندیدا بکى، چونکى ئەو وەکى مێشێن پیس لێهاتینە وان کەرب هەمبەر جوانى و پاکژى هەیە، و هەتا بێهنا خۆش ژى مەترسیە ل سەر وان، لێ ئەڤ پەروەردەیا رۆحى ل سەر سەهم و ترس دیتنا تاوانا گەندەڵیێ زۆر گرنگە پێناڤ سەر ژنوى ئاڤاکرنا جڤاکەکێ ناخپاک و دەستپاقژ و دەرۆن زەڵال، و ئەڤەیە دیوارێ ئێکێ هەمبەر خرابیا تاڵانا گەندەڵیێ و دیوارێ دویێ ئیدارەکرنەکا موکما سیستەماتیکە و بەحس و خەبەرێت وێ ژى دڤێت هەر بهێنە گۆتن بئاناهیا خودێ.