دادپەرەوەریا جڤاکی یٔاکو سیستەمەکێ یٔابۆریێ کومەڵایەتی ھەبت ژ یٔەنجامێن وێ جوداھی و پلەپلەییا زۆر مەزن دناڤبەرا چین و تەخێن جڤاکی کێم ببن، و یٔەو خێروبێرێن وەڵاتی ھەین خەلک پشکداربن د مفاوەرگرتن و د خۆشی دیتنا واندا

کەواتە: وەڵاتەک خوەدی سامان و کانزابت، یٔەگەر دادگەریا جڤاکی ھەبت قەت نابت ھەژاری چاڤێن خوە تێدا زیق بکن ب چ پێڤەرەکێ ژ پیڤەران بت ھەتا یێ قەرەقۆشی یانژی حوکمێ سەکسۆنیا بت، و کا چەوان یٔاڤ بۆ ژیانێ فەرە وەسا دادپەروەری گرنگە بۆ ھەمی جڤاکێن مرۆڤایەتیێ!

و ژ گرنگیا ھەبوونا ڤی جۆرێ دادیا یٔەم ل دۆر دپەیڤن یٔەوە: ھەستا ھاوڵاتیبوونێ پەیدادکت، و یٔیمناھی و یٔاسایشێ بەرقەرار دکت، و یٔارامیا دەرۆنی بجھدیٔینت، و بیێ ڤێ دادپەوەریێ، ھەر ھاوڵاتیەکێ خوەدی ھەست و ھۆش بت ھەلبەت د چاڤ و دلێ ویدا وەڵات دبت زیندانەکا تاری و نە خۆش، ھەرچەندە بلا نەیێ ھەژار ژی بت، 

لێ مادەم  ل بەرچاڤێن خوە دبینت جۆرەکێ جۆداکاریێ بەردەوامە، وبەڵاڤکرنا سامانی نەک ل سەر پێڤەرێن درۆستن، و دبینت ب نەحەقی ھندەک ژ باڵادەست و ھەڤالبەندێن وان بەھرێن مەزن ژ سامانێ دبن زێدەتر ژ وێ یا دگەھتە وان، وی دەمی ھیچ گومان نینە یٔەوا دگەھتە وی بلا بخوە تشتەکێ باش بتن ژی ب ڕێژەیەکێ ژ ڕێژەیان لێ دەڤ وی وەکی ژەھر و قوزەلقورتێ لێ دھێت، و دیسان ھەر کەسێ ھەستێ مرۆڤان ل دەڤ ھەبت دێ خوەبینت یێ یٔێخسیرە د ناڤا مالا خوەدا، یٔانکو د وار و وەڵاتێ خوەدا، و یٔێدێ گیان و یٔیرادەیا بەرگریێ ژی دێ ل دەڤ مرت!


   یٔەھا ھۆسا زەڵامەکێ دانەعەمر بەرسڤا پرسیارا خەلکەکێ دا دەمێ گۆتینی: مام چما شۆرەشا زەمانێ ھەوە پشتی چەند ساڵێن ھەڤپەیڤین و لھەڤاتنێ (ھودنێ) شکەستن یٔینا؟ یٔەوێ ژی ھۆ ب ڕۆھنی و بیێ مەللاقی و نیفاق و دووڕویاتی گۆتە وان: مامۆ بڕاستی دەمێ مە بەرێ تڤەنگێن خوە ددانە سینگێن سەربازێن دۆژمنی د ستێرکا واندا تەلاری فلانی مە ددیت و قەسرا بیھڤانی دەردکەڤت، یٔێدێ مەژی گۆت: یٔەم شەری بۆ کێ بکین؟!

    

    من نەڤێت یٔەز پتر درێژبکم ھەچکو یٔەڤ ھەڤیرە حەزدکت گەلەک یٔاڤێ ڤەخۆت، لەوا دێ بکورتی بێژمە وان کەسێن تا ڤێ گاڤێ پەسنا ھندەک گھورینێن یٔاستنزم دکن ل ڤێرێ و ل وێراھە، و ھندەک بەندێن حێفتیارا دبێژن، یٔەز دبێژمە وان: ما دەم عەدالەتا جڤاکی نینە یٔەڤجا بخودێ حالەکێ وەکی یێ مە خوە مەیمون (یٔانکو مەیمینک) ژی پێ قایل نابن و قەبیل ناکن!

و دەربارەی یٔاخفتنا ل سەر ھەلویستێ مەیمینکان ھەمبەر بێ دادیا جڤاکی شاشەیا گەناڵێ نەشیوناڵ جوگرافیک تاقیکرنەک ڤەگوھازت:  کو دوو مەیمینک پێشچاڤبوون و ھەر یەک ژوان د قەفەسەکێدابوو، و زێرڤانێ باغێ گیانەوران دوو بەرکێت بچویک یٔینان و ھەر یٔێکێ بەرکەک ھاڤێتە بەر، و دوێڤڕا و ژوان خواست بەرکێن وی ڤەگەڕینن،

و دەمێ فەرمانا وی بجھیٔانین رابوو  پرتەکا خیاری ھاڤێتە بەر مەیمینکا یٔێکێ، و تەماشەکر کادێ چ کارتێکرن ل سەر ڕەفتارا وێ ھەبت، ھەمیان دیت یٔەڤێ مەیمینکا ژمارە یەک خوە ژ کەیڤاندا ھەلاڤیت و ب شەوق پاداشتا خوە خوار، لێ زێرەڤانی پاداشتەکێ جودا دایە مەیمینکا دوویێ کو ویشیەکێ تریێ ڕەشبوو،  و دەمێ مەیمینکا یٔێکێ یٔەڤ تشتە دیتی گەرماتیا وێ بۆ خوارنا خیارێ کێمبوو، لێ زێرەڤانی ھەمان کریار دووبارەکر، ودیسان دەمی بەرک بۆ زڤڕاندین پرتەکا خیاری دایە مەیمینکا یٔێکێ،

بەلێ ڤێ جارێ یٔەوێ خیارێ خوە نە خوار و خوە گرت و چاڤەڕێ ما کا دێ ھەڤالا وێ چ خەلات وەرگرت، و دەمێ دیتی دیسان زێرەڤانی ویشیەکێ تری دایە ھەڤالا وێ، تۆڕەبوو و خیار ل ناڤچاڤێن زێرەڤانی دا، و جارا سیێ زێرەڤانی ھەوڵدا ھەمان تاقیکرنێ یٔەنجام بدت، لێ ڤێ جارا داویێ مەیمینکا یٔێکێ یەک چرکێ ژی خوە نەگرت و نەما ل ھیڤیا خەلاتێ خوە، بەلکی ھەر کار ژی بۆ زیرەڤانی یٔەنجام نەدا و بەرکێ وی وەرگرت و یٔێکسەر ل ناڤچافێن وی دا، باشە یٔەگەرێ ڤێ تۆڕەیا زێدە یا مەیمینکا ژمارە یەک پشتی کەیفخۆشیەکا کورت چ بوو؟!

بەرسڤ یا دیارە بەلێ دێ ھەر بێژین: یٔەوە کو دەمێ دیتی ھەڤالا وێ ل سەر ھەمان کریار پاداشتەکێ مەزنتر ژ یێ وێ وەردگرت، یٔەڤجا پاداشتا وێ ل بەر چاڤ و دلێ وێ ڕەشبوو.

یٔەوێ تاقیکرنێ سەلماند کو داپەوەریا جڤاکی تشتەکێ خۆرسکیە، و تێکدانا ڤێ دادگەریێ ل کوردستانا مە یٔەوا ب شەڤ ڕۆژ یٔەڤە دەھان ساڵە بەردەوامە، یٔەڤ وەڵاتە یٔەگەر ڕەوشا وی ھەر ھۆبت یٔەڤ ستەمە د بتە سەدەما ژناڤچوونێ، یٔەرێ گەلۆ چەوان دێ خۆدێ قەبوول کت گەنجێن وەڵاتی  زڕبەھربن و ژبۆ خۆشیێن خێروبێرێن خاکا خوە بمرن، و بەرپرس و سوپایێ وان ژ مەللاق و بندیواران پێ بمرن؟!