"گەلێ بێ وەڵات" ئەڤ دەستەواژەیێ ل ساڵا 1897 ژلایێ فەیلەسۆفێ هزرا زیونیزمێ تیودور هیرزل(Theodore Herzl) وهەڤالبەندێن ویڤە ل کونگرەیێ بازل ل سویسرا هاتیە دەرهاڤێتن تا نها جهێ مەندەهۆشى و حێبەتیا خەلکێیە، هەرچەندە هزرا وان یا بوویە ژیوارەکێ سیاسیێ هەرە مەزن ل رۆژهەلاتا ناڤین، واتە: وەڵاتەک ژبۆ گەلەکێ بێ وەڵات ل فلستینێ هاتە چێکرن، لێ یا سەیر و سەمەرتر و هەژێ وێ چەندێ دونیا هەمى مەندهۆش ببن و دناڤدا ئەم کورد تەپا ل سەرێ خوە بدین ئەوە یا ئەڤرۆ ل هەرێما کوردستانێ چێبووى، پشتى تشتەک ب دەست مە کەفتى، و فەلەک بچەکێ ل گەل مە بوویە یار، ئەو وەڵاتێ مە خەوەن پێڤە ددیتن پشتى بۆیە ڕاستى جارەکا دیتر ل مە هاتە بەرزەکرن، و وەڵات ژ خەلکێ وەڵاتێ هاتە ڕەڤاندن، گەل دیسان مایە بێ وەڵات!
ڕاستە – وەکو ناڤ - وەڵاتەک هەیە ب ناڤێ باشۆرێ کوردستانێ، یانژى هەرێما کوردستانێ، لێ هەمى دزانن: ئەو وەڵات یێ کێیە، و ژبۆ کێیە، کینە ئاخ و ژێر ئاخا وى پاوانکرین، و کینە ژ وەڵاتى ناڤ بتنێ بۆ مایین، کینە خۆشى و زەنگینیا ڤى خاکى ڕەنگەڤەدانا خوە ل سەر وان و خێزان و یار و ڕەشەکێن وان کرین، و د هنگڤینێ ڤى واریدا نقومبووین، و کینە دەڤێن خوە د باى وەردکن؟ !
ئەڤرۆ هەمى کەسێن هۆش و سۆز هەین دەمێ دناڤا باژێرێن کوردستانێدا دمەشن هەست ناکن ئەڤ باژێرە ب جادە و ئاڤاهى و ئاڤ وبایێ وێڤە یێن وانن، ئەڤ خێر و بەرەکەت یا وانایە، بەلێ مرۆڤ بۆ خۆدێ بێژتن: تاما تەحلا زڕبەهریێ – ئەو بتنێ - یا وانایە !
گەلۆ کا وەلاتێ وان گەنجان یێن نەشێن ب گەهن سادەترین مافێن خوە وکو: ژنئینان، چەند مێترەکێن ئەردى، خانى، دامەزڕاندن، و ژیارەکا ئاسان...هتد ژ پێدڤیێن فسیولوجى و کومەڵایەتى؟! هەمیێن بووینە خەونێت شرین ئەوێن کەسێ باوەرى نەماین ب ڤى دەست و دارى رۆژەکێ ژ رۆژان دێ بنە ڕاستى .
ئەگەر بێ وژدانەک یانژى بێ عارەک نەبت ئەو کییە پشێت بێژت: کوردستان وارێ وەڵاتیێن کوردە، و دڕاستیا خوەدا هەمى مەرج و مافێن وەڵاتیبوونێ ۆندانە هەتا وى ڕاددەى مافێن سرۆشتى یێ ژدەست چووین، و ژدەولەت سەرێ ڤێ گەندەڵیا ب سیستەم و ب یاسا و ب هێز و ب هەمى رێک و رێبازان دهێتە کرن ژیان یا بوویە ژەهر، ئەرێ کا مافێن خودێ داینە هەر مرۆڤەکێ ل سەر ڕویێ ڤێ ئەردى ئەوێن (جان جاک رۆسۆ)ى د (Social Contract گرێبەستا جڤاکى) دا تەکست لێ کرین مینا: مافێ ژیانێ، مافێ وەکهەڤیێ، مافێ خوەدیبوونێ (مولکداریێ)، مافێ رۆمەتداریێ (کەڕامەتێ)...هتد؟ !.
ئەرێ د وەڵاتێ مەدا ژیانا چەندین هەژاران ب داوی ناهێت و ژ ئەگەرێ ستەما کومەڵایەتى و سیاسى پێچێبوونێن کڕینا دەرمانێن گران نینە؟!، و چارەسەریا باش نە د وەڵاتێ واندا هەیە، و نە وەکى بەرپرس و خێزانێن بەرپرسان شیانێن دڕاڤى هەنە بەرێ خوە بدن دەرڤەى وەڵاتى پێخەمەت چارەسەریێ، و یا هەژارن پێ چێدبیت ئەوە ل هیڤیا ئزرائیلى دمینن تا گیانێ وان ژ لاشێن وان هەلکێشت و ببنە قوربانێن خۆدانێن ڤى وارى ژ میر و دەستهەڵاتداران .
و وەکو میناک دێ بێژین: کانێ ماڤێ خودانبوونێ (مولکداریێ) ل کیڤەیە؟! و هندى پرۆژەکێ قازانج تێدا هەى یان یێن کار ب دەستانن یانژى ئەو هەڤپشکێن سافینە ل گەل هندەک دەولەمەندان !
دبێژن کوردستان هەر چەوابت بهەشتە، ئەرێ والله ڕاستە بەس بۆ کێ بهەشتە؟ !
جارەکێ هەڤالەکێ گۆتە من: فلان کەسى – ل رۆژا ئێکێ یا دەواما خوە وەکو سەرۆکێ شارەوانیا باژێرەکێ کوردستانێ- گۆت: دێ ڤێرێ وەکى سوید لێ کین، و مەزنەکێ دیتر گۆتبوو: دێ کوردستانێ مینا زەنگینترین دەولەتا خەلیجى لێ کین !
من گۆت بخودێ وان هەردوو جوامێرا کێم خەمى نە کرن و سۆزێن خوە بجهئینان، و کرنە سوید و دۆبەى بەلێ نە بۆ جنابێ تە و مللەتێ تە، ما تۆ نابینى: ڤێرێ یا بۆ وى و مرۆڤێن وى و مەزنێن حزبا وى ژ وەلاتێ سوید باشتر لێ هاتى، ئەو هەمى وەکى خەلکێ سوید و زێدەتر ژى یێن کەفتین خوەشیادا، هەمىێن بووینە لورد و قرال و تەڵارێن وان ل هەمى کنارێن باژێرێ گەهشتینە عەوران، و جوامێرێ دیتر ژى ئەو ب خێزان وماڵباتڤە یێن هەڤڕکیێ دکن ل گەل مەزنترین دەوڵمەندێن جیهانێ ئەوێن سەنتەرێ بازرگانى و بزنسا وان ل دوبەى !
برایێ من ئەها کوردستان وار و وەڵاتێ وانایە، بهەشتا وانایە، و ئەوان مننەت ب بهەشتا خۆدێ ژى نینن، و ئەم خەلک ژى ئەو گەل و مللەتین یێن وەڵات ژێ هاتیە دزین!