ل ساڵا 2010 سەرپیچیەکا کارگیرى وەڵاتێ سوید هەژاند و ڕاگەهاندنا ڤێ دەولەتێ هەڵامەت ڕاکر و گوننەهـ مینا تاوانەکا مەزنا لێبوورین ژێڕا نەهەى نیشاندا، ئەوژى پشتى سەرگەشتا (پاڕێزگەرا) ستوکهۆڵما پایتەخت هاتیە توهمەتبارکرن ب گەندەڵیا پرکرنا ئۆتۆمبێلا وێیا تایبەت ب کارینانا کۆبۆنەکا تەرخانکرى ژبۆ کاروبارێت فەرمى، بەڕەڤانیکرنا وێ خانمێ ژخوەکرى مەهەدەرا وێ نەکر و بارگرانى ل سەر وێ سڤک نە کر؛ دەمێ گۆتیە دادوەرى: من ژ نەچارى وەکر چونکى پارە ب من نەما بوون و ئەز دا مینم ب رێڤە، لێ دادوەرى هێجەتا وێ ڕەتکر و بەرسڤا وێدا: ژ تە نا هێتە قەبوولکرن، بلا تۆ ب شەمەندەفرا گشتى ڤەگەڕیاباى، و ژ ئەنجامێ سزادانێ پارێزەرى ل سەر ئەندامەتیا وێ د پەرلەمانیدا ژى هاتە ڕاکرن، واتە: ڕەفتارا ڤێ بەرپرسا مەزن ب خیانەتکرنا ل ئەمانەتێ هاتە تۆمارکرن، ل داویێ ژى بێ گاف ما دەست ژکارێ خوە ڤەکێشا، و ژیانا وێیا سیاسى ژێرئاخ بوو!
ئەگەر ئەڤ بۆیەرا نا بیتە دڵۆپەک ژ دەریا گەندەڵیا کوردستانى خیانەت بت، و هەژى سزادان و لادانا ژ سەر کارى بت، ئەرێ گەلۆ یا ل ڤى وەڵاتى د هێتەکرن کو سەدەها ملیارێن دۆلاران دهێنە داعویران، و کوردستان وێرانکرین، و ئاخ و با گەنى کرین، ژبلى خیانەتا نیشتمانیا هەرە مەزن، (خیانەتا عوزمى) زاڕاڤەکێ دیترێ گونجاى هەیە ب کەفیتە سەر؟!
د وەڵاتێ مەیێ شریندا پتر ژهەمى دونیایێ بەحسێ خیانەت و هەڤخائینکرنێ دهێتەکرن، مەژیێ سەرێ مە چوو ب گوهلێبوونا چەندین مێژوویێن جوداجودا یێن خیانەتا نیشتمانى و خاکفرۆشیا ئەڤ لایەن و لایەنێ دیتر هەڤدوو پێ تۆمەتبار دکن و هەر ئێک ل دەمێ دەرفەت بۆ دهێت یێ بەرامبەر ژ نیشتمانى و نەتەوەییێ گاور دکت بـ (گاورکرنەکا سیاسى)، لێ یا سەیر ئەوە جۆرێ خیانەتا ل بلنداهیا چیا مەزن و پێشچاڤ ئەوا د دەرحەقێ گەل و خاک و نەتەوا کورددا دهێتە کرن، ئانگۆ: ئەو گەندەڵیا ب پیسترین وێنەیێ وێ ل سەرانسەرى جیهانێ نەهەى لێ - زوى ب زوى - ب خیانەتا نیشتمانى ل قەلەم نا هێتە دان!
باشە: تێکدانا ئابۆرێ کوردستانێ نە خیانەتا نیشتمانیە، دەمێ مال و سامانێ وەڵاتى هندەک بەرپرس و کومپانیێن بیانێ ل گەل کتەکا دەولەتان ژى ل خوە بەهرڤەکن، و د وەڵاتێ زۆر زۆر دەوڵەمەندا برس و هەژارى ببیتە گورک – مینا عبد الرحمن مزیرى دبێژیت – ل کولانێت دهۆکێ مرۆڤان بخۆت، ئەرێ خیانەتەکا نیشتمانى ژڤێ چەندێ مەزنتر هەیە؟!
ئەرێ ژبلى خیانەتا نیشتمانى چ ناڤەکێ دیترێ دروستە ب کەفیت ل سەر ڤێ بێ وژدانیا دهێتە ئەنجامدان ل گەل ڤى زێڕێ ڕەش ژ ئەردێ کوردستانێ ب شەڤ و ڕۆژ دهێتە مێژتن ژبۆ بەرژەوندیێت تایبەتێن گەندەڵکاران ب چۆرەکێ گەلەکێ کەمباختر ژ وان بەرژەوندیێن سیخور ب خیانەتا خۆ ب دەستخوەڤە دئینت، هەتا سامانێ یەدەک ژى بۆ نفش و بەربابێن بهێن نە هێلان ویێ بۆ خوە دفرۆشن، و داعویران بەردەوامە بئاوایەکێ والله خرابترین دۆژمنێت کوردستانێ هۆ نە دکرن، چونکى وەکى مە دیتین بکێمانى ئەڤ سامانێ یەدەک ژ دەستێن وان پاراستى بوو، ئەى هەوار هەردەمێ ئەز ئاگرێ هەرێ کەش ب سەرێ بۆڕیێت دەرئینانا پترۆلێڤە دبینم و ل رەخێن دیتر خەلکێ دبینم کا د چ حال دانە ئاگر ب جەرگێ من دکەڤیت، و بیرا من ل هەلبەستا هوزانڤانێ عیراقیێ مەزن (بدر شاکر السیاب) دهێت ئەوا ب (المومس العمیاء – بەربەدەنا کورە) ناڤکرى، کو بەحسێ سەرەدەریا زاڵمانە دکت ل گەل سامانێ پترۆلیێ عیراقێ، و سالۆخەتدانى وى وەسا خوەیا دکت مینا سەرەدەریا هندەک زەلامێت بەدڕەوشتێن گڕێ خوە هەزارێن جاران ب ئافرەتەکا دەهمەنپیس شکاندین، لێ ل دەمێ پیراتی ب سەردا هاتى و ژ بیناهیا چاڤان کورەبووى ئەوان ئەو ژنە پشت گۆهـ هاڤێتن، و پیرەژنا کۆرە مایە بێ خودان!
خودایێ مەزن ڤى وارى ڕەند ژ چارنڤێسەکێ دراماتیکیێ مینا وى شێوەیێ بوورى ب پارێزیت، بڕاستى مەترسى ئەوە دناڤ خەلکێ ژیدا خیانەتا نیشتمانى بەڵاڤ ببت، و وەکى کارەکێ ئاسایى بەرێخوە بدەنێ، چونکى ئەگەر مەزنێ ماڵى دەهۆلێ ب قوتیت هەڵبەت دێ کابانى و خەلکێ مالێ داوەتى و سەماگیربن.